DATA BMKG 14 Oktober 2019

Cae Medya Hus 'Haba Keu Waki Rakyat'

Cae Medya Hus 'Haba Keu Waki Rakyat'

Mestro Seni tutur Aceh, Medya Hus

Assalamu'alaikum saleuem horeumat Keurakan sahbat umi ngon ayah Saleuem bak kamoe jinoe peu intat Neusambôt leugat saleuem ukhuwah

Alhamdulillah Allah taingat
Lam jeuet sa`at bèk na meubantah Dum jeunèh pujoe keu sidroe Kudrat Seumbahan Umat lam jeut jeut saah

Όh lheueh tapujoe sidroe Hadharat Seulaweuet meuhat beuna di babah
Ta meuseulaweuet keu Nabi Muhammad Pang Ulèe Umat Akhlaqul qarimah

Ngon keluarga seureuta Sahabat
Όh lheueh nyan meuhat 'Ulama dum sah Awai ngon akhé sabé taingat
Peutnyok umat bèk rôh buet salah

Ammabakdu laju tasurat
Keu waki rakyat haba meupeugah
Nyang kalheueh teupileh meucéh ka mangat Ka geulantik meuhat keu dewan kasah

Uleh KIP Acèh bèrèh leupah that Keu waki rakyat geuteutap ka pah Mulai DPRA DPRK meuhat
Ban dum kamupat kurusi ka jeulah

Dan DPRI DPD meuhat
Deungon su rakyat kasôk bajèe jah Duek bak kurusi tari leupah that Di ék seumangat han peu tapeugah

Ureueng ban teuka nyan waki rakyat Nyang barô meuhat pih ramè leupah Laén nyang awai mantong cit teutap Teupiléh meuhat mungkén amanah

Tapi ban mandum beuna yum meuhat Harapan Rakyat bak dewan dum sah Bèk jeut keu rugoë oh kamoë intat Trôh keunan meuhat seungap sileupah

Beuna sineulheueh bék weueh taingat Bèk jeut meuhambat buet pemerintah Teuntèe kecewa di kamoë rakyat Timu ngon barat perobahan tan pah

Ladôm geupubuet hanjeut taingat Kon pihak rakyat hana searah
Nyang peunténg keudroё seudoe peu mangat Keulompok meuhat sabé jôk jatah

Meunan ladôm deueh ka deuh hai sahbat Ukeue nyoe meuhat beuna meu ubah Beuna perobahan dan beumeningkat Kapada rakayat piké beu jeulah

Piké keu nanggroe lé tanyoe meuhat Amanah rakyat beuna tapapah
Bak dewan barô le kamoe harap Beutrôh ban hajat beu lagèe peugah

Dan beuneupiké laju lé meuhat E waki rakayat bèk meuparikah Bèk neumeupaké reulé martabat
Bèk neumeuhujat pha kursi patah

Bèk peugot Qanun nyang hana teupat Bèk reuloh Syariat wap piké salah
Όh jeuet keu dewan pikéran beusehat Bèk peungeut rakyat ngon ie saboh glah

Dan beutapiké saré taingat
Ke masalahan umat beun tagagah Meunan hai waki ekonomi rakyat Cipiké siat pakiban beu pah

Miseue hai waki produksi rakayat Όh na jeut jeut pat ho publoe bagah Segala bidang kadang meularat Kareuna seubab soe ekonomi tanpah

Bak dewan jinoe kamoe meuharap
Bèk geuduek seungap lam geudôg luwah Meubèk teukabô cit le peue peukap
Bèk lé peue seubab po nyoe jéh salah

Ka dipeucaya apa lé rakyat Ci piké siat pakri ban ulah
Bèk kheun h’an mampu lesu pendapat Ka ta ék siap han jeuet tagagah

Meunan harapan nyan mandum rakyat Neupiké leugat beu ék keuh dum pah Kamoe meudô`a nibak Hadharat
Dum waki rakyat beujroh ngon jeulah

Bèk ta peuetuwo beubako that that Bèk tapeuilat béna amanah
Masa kampanye uneu neuh lethat Neu ajak rakyat haba cukôp pah

Misi ngon visi janji leupah brat
Kheun di keue rakayat meumacam ulah Nyo droe teupileh habéh lôn ingat
Timu ngon barat bandum tapeupah

Bak tameuhaba kadang ka silap Igoe takap-kap gop gop tahujah Demi meunang droe kiloe gop siat Watèe kaliwat ban dum takeubah

Dak jeuet model nyan hai rakan sahbat Beuji ôh that that buet hana jeulah Beubeutoi pubuet ubé jeut tamat
Dak han abéh that meubacut beupah

Όh takeurija beuna meurakyat Όh té na pangkat meubèk le olah
Όh té na bangku bèk leuhu that that Όh té ka mangat gadoh maruwah

Nyang meunan bèk na gata gop hujat Di rakyat luwat nyo ka buet salah
Ho mantong tajak gop teunak meuhat Narit tan mangat dikheun trôk bak yah

Han salah nyang kheun ta eun di hujat Droe teuh meuhat bak awai salah Lheueh tayue piléh meucéh bak rakyat Όh meunang meuhat tan lagèe peugah

Meunan keuh bèk na beuna taingat Nyang waki rakyat neupiké beusah Beutoi membangun mandum meusapat Kesatuan ikat rakyat tapapah

Nyan legeslativ beu arif that Parlemen beusehat bèk meuparikah Ngon eksekutif nyan pih beupah that Bèk meuén silat teubriek bajah

Harapan kamoe jinoe jeut teumpat Dum waki rakayat kenerja beupah Supaya nanggroe jeut sagoe hebat Timu ngon barat adé deungon pah

Aneuk leuek meusu ateuet u teupat Ateueh bak langsat na aneuk tiwah Et noe keuh caé rawé lôn surat
Nyo kurureueng mangat lôn lakèe meuah

Kasép keuh èhnoë meurampoë riwayat Meu`ah e-sahbat meunyo na salah Bak watèe laén salén lom meuhat
Lôn piyôh siat rakan meutuawah

 

Tulisan ini sudah tayang di Media cetak HD Indonesia : Edisi : 03  ( 02-15 SEPTEMBER 2019)
 

Komentar
Baca Juga
Terbaru